ولا يوم حسيت حالي نازحة
لأني بعتبر انو جنسيتي اللبنانية
وحبي لوطني مش محدد بزاوية وحدة
وإني بنتمي لكل بقعة ارض فيه .
الأرزة اللي بتتوسط العلم بتزيد عندي الشموخ والصبر على كل التحديات والصعاب متل ما هيي بتواجه الرياح العاتية والصقيع .
والبحر اللي بتطل عليه شرفة بيتي بخليني رافقو بكل مشوارو .
أما عشقي للجبل والشوف والشمال والبقاع والجنوب وبيروت وزع بقلبي شقفة لكل منطقة فيهن .
الدم بيسري من القلب للشرايين والأوردة لتشمل كل الجسم . لهيك انا لو كنت بأي منطقة فبعتبرها بتعنيني وإني بنتمي الها لهيك انا لو كنت بأي منطقة ما بحس بالغربة لأني تحت سما بلدي وتحت شمساتو ونسماتو . انا أنتمي لكل لبنان انا منه وهو مني .
كيف بكون نازحة بوطني وانا عادة لي شغف اني اتنقل بين ربوعه وجباله وغاباته ومناطقه الحلوة .
وكيف كون نازحة ما دمت لا أرمي بثقلي على أحد فقد اخترت مكان إقامة بعتبرها استجمامية وادفع ثمن إقامتي وكمان بضيف من ازدهار اقتصاد الضيعة اللي انا فيها لأني عم بشتري كل احتياجاتي منها . وكيف بدي حس بغربة ما دام عندي من الأساس فكر بيتفهم الآخر وقلب بيتعامل بمحبة وإنسانية ؟
انا مش نازحة ولا اي لبناني نازح لأن لبنان لكل المواطنين ومحبتو بتجمع الكل تحت راية وحدة هي العلم اللبناني اللي رح يضل عالي وغالي بقلبنا.
يمكن تغيرت عليي نومتي وسريري ومكان اغراضي وعتبة بيتي بس قلبي حاملتو معي وحاملة فيه كل شي بحبو كل اصحابي ورفاقي وضحكاتي وذكرياتي وخرير نهر ضيعتي والعصفور اللي كان يصبحني على الشباك كل يوم كل هول رح يرافقوني بمشواري وين ما كنت .
واكيد خسرت أشخاص بحبن لكن بعرف أنو حب الأرض والوطن اغلى وروحن رح تبقى مرفرفة حوالي.
ما يمكن تكون نازح وانت بقلب وطنك
اللي بتحبو وهو بحبك .
انا مش نازحة لأن اي لبناني باي مكان هو من أهلي .
واكيد رح نرجع نلتقي من جديد
رح نتجاوز كل شي صعب لأننا ” الشعب العنيد”
ورح ننتصر بعزيمتنا وإرادتنا عالأكيد
آمنة ناصر
.