تا نفترض ما في حدا بيموت !
كتب د. المهندس إبراهيم شحرور
تا نفترض ما في حدا بيموت
ولْ ساكنين المقبرَه … مش ميّتين
متل اللي زهْقو شْوَيّ من عتم البيوت
متل اللي راحو يْقيّسو التابوت
وْرح يرجعو لْ مطرح مَ كانو ساكنين …
عنُّن بيزيحو شرشف تْرابُن
لْ كلّو دمع وزْهور …
بينفّضو تْيابُن
بتْهرّ غبرة عمرُن المكسور
من يوم دقّ الموت عا بابُن …
وبْيعزمو نجمةْ صباح النور
ترجع تمحّي إسمُن المحفور
عَ رْخامةِ غْيابُن …
في عْيون رح ترجعلها الضحكِه
نْ شافت لِ رجْعو … بعد ما ماتو
وْفي عْيون رح تبكي
أكتر مَ بِكْيِت … وقت ما ماتو …
.